Hebrews 13

Hetofana lolo huto nehinogo Hu'mau gelo bilinamofihi ka'a

1Mono kagu gona'a go'afihi komopatini ai eminogo ai eminogo hilata nehanamofihi ya'ma lenalitoga su meheno. 2To ka'i logo lili bona'i enebe tigite nohatiniluga enele'mo malalune lite kosele'i meleneheno. Luga'amagi enali bonoho bona'i atilo lite enele'me mele'ehite agelo nehana'muya enali mekeheli'ahana. 3Lenigibo lenagabo, mono kumu yabe lite lalutimagihi naga nonugu enele'mo mele'ahana'a enali kumu kehelite ana naga nonugu lali minaluta suhi hite nehabe lite kehelite lenekesu meheno. Ya nehite luga'a enele'mo sibina sabana hi epele'ahana'a enali kumu keke'i luse'namofihi komopa'agu neminana'a ya'ma lenali ana hite keke'i luse'na'ani lenugupisalo suhi huto ti'ehina'a kehelite enali kumu lenekesu meheno.

4Bo alobole nemina'ina asaga'i ya'ma legeya'amofihi nasana'mu keheli emilabe. Bo alobolemale'i lolo neha'ina suhi lite li sibi mehilo. Mokolo'na to ate ate lite humofa'na nehana bona'i enali'i Hu'mau foipana'animofihi nona'a molo epalalina'mu yabe.

5Lenali komopatini yogo fe'notoga mebino. Ana'inatini li'ahana legegeto yana'mu babahi hite le'mo fulu hilenogo bati hite minalo. Hu'mau ai'a ma luto lu'ehina:Nani mone mehe'mi lepalaluna'mu yabe. To nani lenalitogati mone bufa mehiluna'mu yabe. 6Ya luto lu'ehina yana'mu lali amuya lilototi mono bukugu fayahi keye'ahana kaga ma luto lilutagi:

  • Sipi Bouba ai nele'mo bati hulata
  • nehe'mose bo nohinagihe.
  • Nani ana'ina yana'mu
  • koli mehiluna'mu yabe.
  • Bona'i enali hena hite
  • nele'mo sibina hilabe?
  • Yanamofihi nelesa melilina'mu yabe.

7Yata'a kaba botini Hu'mamofihi ka'a lu lepilata hi'ahana enali kumu beto hite minalabe. Ya nehite mono'mofihi kapo'alo nebite fili'ahana'a enali enigiyaka'a bu goya ite minete enalitoga enemege'i melete keheli ule'ale hise'namofihi komopa'agu ya hite minelete lenekesa kehelilo. 8Yesu Kilisitou ai'a koyapa'i kohe toto mino'ehina to yatai hiti minoto ana suhi lolo huto mino lito buto minalina'mu yabe. 9To fato fato'namofihi kosaba kaga nelite li lenelepinogomo kehelite kaba hu bati hilo. Ana kagauba lamana kapo i pebisa hete nebinogomo enemege'i memalalo. Hu'mau lenehe'mose'nauba komopatini le'mo hetofa hu lepelenogo ya'ma bebe salube'mu nohibe. Nose'na nolatanamofihi mo silatanamofihi lu laga hi'ahana ka yanauba mone lele'mo bati mehilina'mu yabe. Yamofihi kapo'alo bi'ahanamagihi legeya'a mone li huto mehi'ahanamo ni'ibe.

10Mamufa gilata hitalo mele'ahana nose'na ya'ma Yuta bona'magihi bebe sose go nonugu Hu'mamofihi agoya hi emilata nehana bona'i enali nalabe luto keheli meepi'ehina yabe. 11Lenali akeheli'ahabe. Mamufa gilata bomagihi kaba bo'aniuba meme yaga bulumaka yaga hoto ho gilito golaha'a ya'ma foipa nasanamofihi kolo tanana'ani nokala hu epololata mono nohi bebe sose nonugu lelito tilago ana yagamagihi gufa'ani bihu gegisaguti nosipetoga lelite limite logogu ge epelelata nehabe. 12To Yesu ana huto ai'a golaha'atu foipa bona'magita komopati nokala hu epalalube luto bihu gegisaguti nosipetoga hago fili'ehina yabe. 13Ya hu'ehina'mu lali ana huto Yuta bona'magihi koyapa'i mono gegisaguti nosipetoga aitoga limite gupisalo gili hite kiya hi'ahana nasana ana suhi huto lugupisalo tinogo kofilune. 14Ya luto nekehelito ya hilune. Minoba minoba hepa'i mone maga lalitoga meni'igi fa'mene minoto hepa'i huto hilina'a yamofihi ya'ma komopatiuba geba hulata nohibe. 15Ya'mu asaga yupahi lali Yesuhi gi'a le'mo saga huto labagaguti Hu'mamofitoga molo emito fokehi hoto minaluta nasanauba lali mamufa gi emilutana lolo hinogo Yesuhi lu eminogo Hu'mamofihi lepilibe. 16Hetofa foya lilatana agoyana hiti to fe'nohi guna ite epilune lite lenegekesa kehelite minalo. Hu'mau ai'a yanamofihi kehelito bu go laga nohigo mamufa gi emilata nasana suhi huto legeya'a lolo hulata nohibe.

17Kaba botinimagihi ka'ani kehelite agoya hu epite enali enigi'aluga limite minalo. Enali ya'ma lenemehatinimofihi nasana'mu kehelite babeyafalo kaba hi lepelete le'mo fu lite neminete enabasu mebilata nehabe. Ya'ma foya'animofihi hapa'amu alihi kanalo ya'ma foya lilatana Hu'mamofihi bulo li huto hilana'mu yabe. Ya hu'ehina'mu foya'ani komopa'a le'mo bati hite lilabe linogomo agoya hi epelete ya suhi ma suhi li epalalo. To lenali pelesa ilenogomo enali keke'i nelite foya lilabe. Ya hinogo ya'ma lenele'mo bati hilina nasana lenalitoga huto mehilina'mu yabe.

18Lenali lali kumu yabe lite Hu'mamofitoga kaga lite minalo. Lali eto huloto legekesa kehelise komopatigu bati higo keta huse'na meni'igo keheliya ito asaga yupahi eto huloto lito moloto hilune luto amuya mololata nohune. 19Lenali Hu'mamofihi nani kumu loka halo, ya luto buka notube. Aitoga ka lu emilana nele'mo bati hulenogo ai hupamone kana nele'mo behe hinogo lenalitoga mele'isi bilube luto lu nolepube.

Hu'mau lusa gi lepalalibe luto lu'ehina ka'a

20Fulu husemofihi afo'afu, Hu'mau ai Sipi Boti Yesu ai'a golaha'atu lele'mo bati huto ule'ale hu letoto minolatana ya'ma minoba minoba mu tifise'namofihi ka'a li huto hina'mu yabe luto sipisipi yagamagihi kaba bo'ani lolo hu'ehina bo fili'ehinaguti le'mo ho tito ho lifi'ehina bo nohigi, 21ai'a ya'ma nasana lamana'a fato fato'mofihi li huto hu lepito lenele'mo babahi hulenogo ai lilina'a malalina'a keheliya ilabe luto nolube. Ya nehinogo ai'a kehelinogo bu go laga huse nasana Yesu Kilisitohi amuya'auba komopatinigu mineno. To ai fana mehena'a huto hilenogo foke ka lelite binogo mino lito buto minalinamo ni'ibe. Lama'naka.

Ka'a anasi su halibe

22Nigibo nalalu'nigita, nani kaga mone lu lepi'ohuna'a yatama meni'ibe. Lenali lenegekesa lito lufusatini li hetofa hilina ka'a ya'ma lu nolepugi lenekesa li hokolo hite kehelite minalo. 23To lu lepilugi kehelilo. Lalalutifihi Timoti naga nonuguti gulu he ete'ahago ai mele'isi oto nanitoga nehetinogomo le'moto binogo ma'asi lenalitoga bilube'mu ai hiti bu lenagalu'ibe, luto nolube.

24Kaba botinimagihi hiti to Hu'mamofihi bona'a asaga'magihi nehafihe luto'ni keke'i nolu lepolonagihe luto nolunagi lu epilo. Itali metogati lenalalutinigi enali hiti nehafihe lite keke'i neli epalago lu nolepube.

25Hu'mau lehe'mose'na yauba lenalitoga minomo buto mineno.
Copyright information for BEF